Où Adans nus mist nostre père,
Par le mors de la pome amère ;
Il est, et fu et ert tuz-jors
Vie et lumière as péchéors.
Se vus de ce ne me créez,
Vostre Chapelain demandez :
Dites que mals vus asoupisse,
Si volez aveir le Servise,
Que Diex a el munt establi,
Dont li péchéor sunt gari :
La semblance de vus prendrai,
Le corps Dame-Dieu recevrai.
Ma créance vus dirai tute,
Ja ne serez de ce en dute.
Elle respunt que bien a dit,
Delez li s’est couchiez el lit,
Mès il ne voust à lui touchier,
Ne d’acoler ne de bésier.
A-tant la Vielle est reperiée,
La Dame truva esveilliée,
Dist li que tans est de lever,
Ses dras li voleit aporter :
La Dame dist qu’elle est malade,
Du Chapelain se praigne garde,
Car grant poor a de mourir.
........................[1]
- ↑ Il manque un vers dans le manuscrit.
