Ele est vestue en itel guise,
De cainse blanc è de cemise,
Ke tout li costé li paroient,
Qui de deus pars lacié estoient :
Le cors ot gent, basse la hance,
Le col plus blanc que nois sor brance ;
Les ex ot vairs è blanc le vis,
Bele bouce, nés bien assis ;
Les sorcils bruns è bel le front,
Le cief crespu è auques blont.
Ses mantiaus fu de pourpre bis,
Les pans en ot entur li mis :
Un espervier sor sun puing tint,
E uns livrers après li vint.
Il n’ot el’ Borc petit ne grant,
Ne li Vallet, ne li Sergant,
Qui ne la voïssent esgarder,
Si com il la voient errer ;
De sa biauté n’est mie gas,
Ele venoit plus que le pas.
Tout li Hume qui l’esgardoient,
A grant merveille la tenoient ;
N’i ot un seul qui l’esgardast,
De droite amur ne s’escaufast :
Cil qui le Chevalier ameient,
A lui vindrent si li cunteient,
De la Pucele qui venoit,
Se Diu plaist sel’ déliveroit.
Page:Marie de France - Poésies, éd. Roquefort, I, 1820.djvu/260
Cette page a été validée par deux contributeurs.
244
LAI DE LANVAL.
