Sire, funt-il, nus départimes
Par les Dames que nus véimes,
Ni aviuns nus esgart fait
Or cumenceruns nustre pleit.
Lors rasanblèrent tut pensif
Assés i eut noise et estrif :
Quant il èrent en cil effrei
Deus Puceles de grant conrei,
Vestues de dex bliaus frois,
Chevaucent deux muls espanois,
Virent venir la rue à-val
Grant joie en eurent li Vassal :
Entre eux dirent k’or iert garis,
Lanvax li prox è li hardis.
Gauvain en est od li alés,
Ses cumpaignuns i ad menés,
Sire, dist-il, rehaitiés vus,
Pur amur Diu parlez à nus.
Jà viennent ci dex Dameiseles,
Mut acesmées è mult beles,
C’est vostre amie vraiement !
Lanvax lur respunt simplenent,
E dit que pas nès’ a véues,
Ni amées, ne cunéues.
A-tant furent celes venues,
Devant le Rei sunt descendues :
E mut les louent li pluisur,
E de biauté è de coulur ;
Page:Marie de France - Poésies, éd. Roquefort, I, 1820.djvu/256
Cette page a été validée par deux contributeurs.
240
LAI DE LANVAL.
