Nus hum fors vus ne me verra
Ne me parole n’en ora.
Quant il l’oï mult en fu liez,
Il la baise, puis est dréciez.
Celes qui el tref l’amenèrent,
De rices dras le cunréèrent ;
Quant il fu vestu de nuvel,
Sous ciel n’eut plus bel Dameisel ;
N’esteit mie fort ne vilains.
L’ève li dunent à ses mains,
E la touaille à essuier.
Après li dunent à mangier ;
Od s’Amie prist le souper,
Ne feseit mie à refuser.
Mut fu servis curteisement,
E il à grant joie le prent ;
Un entremès i eut plénier,
Ki mult plaiseit au Chevalier,
Car s’Amie baiseit suvent,
Et acoleit estreitement.
Quant del’ mangier furent levé,
Sun cheval li unt amené,
Bien li eurent la sele mise,
Mut a truvé rice servise.
Il prist cungié, si est muntés.
Vers la cité en est alés,
Suvent regarde arière sei,
Mult est Lanvax en grant estrei,
Page:Marie de France - Poésies, éd. Roquefort, I, 1820.djvu/232
Cette page a été validée par deux contributeurs.
216
LAI DE LANVAL.
