Hum estranges, descunseilliez,
Mut est dolans en autre terre
Quant il ne set ù se cors querre.
Li Chevaliers que je vus di
Ki tant aveit le Rei servi,
Un jur munta sun destrier
Si s’en ala esbanoier.
Fors de la vile en est issus
Tut seus est en un pré venus,
Vers une eve curant descent
Mès ses chevaux fors va tremblant.
Il le descengle, si le let,
Enmi le pré vautrer le fet ;
Le pan de sun mantel ploia
Desous sun chief, puis se coucha.
Mut est pensis pur se mèseise,
Il n’oït cose qui li pleise
Là ù il gist en cel manière ;
Garda à-val lès la rivière,
Si vit venir deus Dameiseles,
Unques n’éut véues si beles.
Vestues furent richement,
E laciées estreitement,
De dex bliaus dé purpre bis,
Mout par aveient biaus les vis.
L’ainsnée purteit un bacins
D’or esmeré, bien fais et fins ;
Page:Marie de France - Poésies, éd. Roquefort, I, 1820.djvu/222
Cette page a été validée par deux contributeurs.
206
LAI DE LANVAL.
