Que par ma folie ai perdue.
E jà est ceo la Dameisele
Qui tant est pruz è sage è bele,
Ke li Chevaliers ad amée
Ki sa serur ad espusée.
Li Sires dit : de ceo sui liez
Unckes mès ne fu si haitiez,
Quant nostre fille avum trovée,
Grant joïe nus ad Deu donée
Ainz que li péchez fust dublez :
Fille, fet-il, avant venez.
La Meschine mut s’esjoï,
Del’ aventure ke ele oï.
Sun père ne volt plus atendre
Il méismes vet pur sun gendre,
E l’Erceveske i amena,
Cele aventure li cunta.
Li Chevaliers quant il le sot
Unkes si grant joïe n’en ot.
L’Erceveske ad cunseilié
Que issi seit la noit laissié,
El demain les départira
Lui è cele qu’il espusa.
Issi l’unt fet è graunté,
El demain furent désevré ;
Après ad s’amie espusée,
E li pères li ad donée,
Qui mut ot vers li bon curage ;
Page:Marie de France - Poésies, éd. Roquefort, I, 1820.djvu/190
Cette page a été validée par deux contributeurs.
174
LAI DEL FREISNE.
