Mut durement l’en ad blamée ;
Dame, fet-il, lessez ester,
Ne devez mie issi parler :
Vérité est que ceste Dame
Ad mut esté de bone fame.
La gent qui en la meisun èrent,
Cele parole recordèrent,
Asez fu dite è conue
Par tute Bretaine fut seue.
Mut en fu la Dame haïe,
Pos en dut estre maubalie,
Tutes li femmes ki l’oïrent
Povres è riches l’en haïrent.
Cil qui le message ot porté
A sun Seignur ad tut cunté,
Quant il l’oï dire è retraire,
Dolent en fu, ne sot qu’i faire ;
La preude femme en haï
E durement la mescréi,
E mut la teneit en destreit,
Sanz ceo qu’ele nel’ déserveit.
La Dame qu’isi mesparla,
En l’an méismes enceinta ;
De deuz enfanz est enceintié
Ore est sa veisine vengié.
Dèsqu’à sun terme les porta,
Deus filles ot, mut li pesa ;
Mut durement en est dolente,
Page:Marie de France - Poésies, éd. Roquefort, I, 1820.djvu/158
Cette page a été validée par deux contributeurs.
142
LAI DEL FREISNE.
