De ses priveiz demande treiz,
A la chambre vait demaneiz.
L’uis commanda ad despécier[1],
Dedenz trovat le Chevalier,
Par le grant duel que il en a,
A ocire le cumaunda.
Gugemer est en piez levez,
Ne s’est de nient éffréez
Une grosse perce de sap,
U suleïent pendre li drap,
Prist en sa main, si les atent,
Il en ferat aukun dolent ;
Ainz k’il de eus seit apreismiez
Les arat-il tous damagiez[2] ?
Le Sire l’ad mult esgardé ;
Enquis li ad è demandé,
K’il esteit è dunt il fu nez,
Et coment ert laiens entrez.
Cil li cunte cum il i vint,
Et cum la Dame le retint ;
Tute li dit la Destinée,
De la Bisse ki fu nafrée,
E de la neif è de sa plaie,
Or est del’ tut en sa manaie.
Il li respunt que pas nel’ creit
Que ensi fust cum il diseit :
Mais se il peut la neif trover,
Il le metreit giers en la mer.
Page:Marie de France - Poésies, éd. Roquefort, I, 1820.djvu/108
Cette page a été validée par deux contributeurs.
92
LAI DE GUGEMER.
