El pan desus ferai un ploit,
Cungié vus doins ù ke ceo soit,
D’amer cele k’il defferat,
E ki despléer le porrat.
Cele li baille et l’aséure ;
Le plet i fet en teu mesure,
Nule femme nel’ deffereit
Se force u cutel ni meteit,
Le chemise li dune et rent,
Il l’a reçeit par tel convent,
K’ele le face seur de li.
Par une çainture autresi,
Dunt à sa car nuë l’a çaint.
Parmi les flans aukes l’estraint.
Qui la bucle porrat ovrir,
Sans dépescer è sans crasir,
Il li prie que celi aint[1]
Puis l’a baisié ; à-taunt remaint.
Cel jur furent aparcéu,
Descovert, trové et véu,
D’un Cambrelenc mal veisié
Que se Sires ot enveié ;
A la Dame voleit parler,
Ne pout dedenz la chanbre entrer,
Par une fenestre les vit,
A sun Seignur va, si li dit :
Quant li Sires l’ad entendu,
Unques mais si dolans ne fu ;
- ↑ aime.
