Il la salue è ele lui,
En grant effrei èrent amdui ;
Il ne la seit nient requere ;
Pour ceo k’il est d’estrange tere,
Aveit paour si el li mustrast,
Que nel’ haïst et eslongast.
Mès ki ne mustre s’enferté,
A paines puet aveir santé ;
Amur est plaïe dedens cors
E si ne pert noient defors.
Ceo est un max qui lunges tient
Pur ceo que de nature vient,
Plusur le tienent à gabois,
Si cumme cil vilain curtois,
Kil’ gulousent par tut le munt,
Puis se vantent de çou qu’il funt.
N’est pas amurs, ainz est folie,
Et mauveisté et lécerie ;
Ki en puet un loïal trover,
Mut le deit servir et amer,
E estre à son cumandement.
Gugemer aime durement ;
U il aura hastif securs,
U li esteut vivre à reburs.
Amurs li dune hardement ;
Il li descovre sun talent.
Dame, fet-il, je muir pur vus,
Mis quors en est mult angoisus ;
Page:Marie de France - Poésies, éd. Roquefort, I, 1820.djvu/100
Cette page a été validée par deux contributeurs.
84
LAI DE GUGEMER.
