paier les gages de ses serviteurs que, leur quartier finy & culs estants prêts se retirer en leurs maisons, si son thrésorier eust dit qu’il n’eust heu pour lors deniers à main, elle faisoit prendre sur sa despense ordinaire de quoy les payer &, oultre leur payement, leur donneoit un surcrois pour faire la despense de leur retour.
Et, cependant qu’elle useoit de cette grande libéralité vers les siens, n’estimés qu’elle fust chiche aux estrangers & incongnus, car elle faisoit du bien à tous, sans havoir acception de personne, je dy sans regarder à qui ne quoy elle donneoit. Nous lisons que Cimon, l’Athénien, souloit souvent festoier les pauvres & commandait à ses gents luy dérobber secrètement argent pour secourir tous ceuls qu’ils entendraient estre nécessiteus. Il est aussi escrit que Abdie nourrissoit aux cavernes les Prophètes, qui s’y estoient retirés à saulveté contre la persécution de l’impie Jézabel. De mesme piété Lucine, vierge Romaine, est fort recommandée pour ce qu’elle vouloit donner secrètement faveur, appuy & secours à toutes personnes qu’elle entendoit faire profession de la Religion Chrestienne.
Mais, s’il estoit possible que tous ceuls à qui Marguerite a aydé & fait du bien fussent assemblés en une place, oncques, du temps de nos pères & du nostre, ne fut veue plus grande armée que seroit leur compaignie. Tous les malades de griefves maladies, tous ceuls qui souffroient nécessité & indigence, tous ceuls qui avaient perdu leurs biens & abandonné leur patrie, tous ceuls qui fuioient la persécution de la mort, bref, tous ceuls qui estoient en quelque adversité, fust du corps ou de l’esprit, se retiroient à la Royne de Navarre comme à leur ancre sacré & extrême refuge de salut en ce monde. Tu les eusses veus, à ce port, les uns lever la teste hors de mendicité, les aultres,
