Le texte de cette page a été corrigé et est conforme au fac-similé.
Guillemette
par mi le col ſoyent pendus
Telz gens qui ſont ſi empeſchables
alez vous en de par les dyables
puis que de par dieu ne peult eſtre
le drappier
Par celluy dieu qui me fiſt naiſtre
iauray mon drap ains que ie fine
ou mes neuf frans
pathelin
Et mon orine
vous dit elle point que ie meure
helas pour dieu quoy quil demeure
que ie ne paſſe point le pas
guillmette
Alez vous en neſſe pas
mal fait de ly tuer la teſte
le drappier
Dame dieu en ait mal feſte
ſix aulnes de drap maintenant
dittes eſſe choſe aduenant
par noſtre foy que ie les perde
pathelin
Se peuſſiez eſclaircir ma merde
maiſtre iehan elle eſt ſitreſdure
que ie ne ſcay comment ie dure
