Page:Maistre Pierre Pathelin, reproduction en facsimilé de 1485, Le Roy, 1907.djvu/19

Le texte de cette page a été corrigé et est conforme au fac-similé.


Forma deux ſi pareilz viſaige
et lung comme lautre tachie
car quoy. qui vous aurait crachie
tous deux encontre la paroy
dune maniere et dung arroy
ſi ſeriez-vous sans diſſerence
or ſire, la bonne Laurence
voſtre belle ante mourut elle

Le drappier

Nennin dea !

Pathelin

Que la vis ie belle
et grande et droitte et gracieuſe
Par la mere dieu precieuſe
vous lui reſemblez de coſsaige
comme qui vous euſt fait de naige
En ce pays n’a ſe me ſemble
lignage qui mieulx se reſemble
tant plus vous voy dieu par le pere
veez-vous la. veez voſtre pere
vous luy reſēblez mieulx que goute
deau ie nen fais nulle doubte
quel vaillant bachelier c’eſtoit
le bon prudomme. et ſi preſtoit
ſes denrees qui les vouloit
dieu luy pardoint il me ſoulloit