Page:Madame de Mornay - Memoires - tome 1.djvu/407

Le texte de cette page a été corrigé et est conforme au fac-similé.

n’estoit proprement cause de son courroux, mais un dessein formé de satisfaire au Pape, duquel on luy faisoit espérer et affermissement au dedans et accroissement au dehors qu’il ne pouvoit dissimuler.

La confiance cependant qu’on luy faisoit prendre que, par la bonne grâce du Pape, il régneroit hors de toute crainte, n’empescha point qu’une femme de St Denis tenant l’hostellerie de la Corne de Cerf, esmeue, comme l’on disoit, de quelque despence que la grand escurie du Roy auroit fait pendant la guerre chez elle, dont elle n’avoit peu estre payée, ne prist la hardiesse d’attenter à sa vie ; laquelle osa s’adresser à monseigneur le conte de Soissons, luy proposer un grand moïen de grandeur auquel elle se promettoit qu’il entendroit volontiers, lequel elle luy représenta en la facilité qu’elle avoit de faire mourir le Roy, par l’accez qu’elle avoit chez la Damoyselle d’Entragues, où elle luy présenteroit quelques fruictz dont le Roy ne se tiendroit jamais, selon sa coustume, qu’il ne goutast ; mais mon dist seigneur le conte en avertit aussy tost le roy, lequel envoya le sr de Loménie qu’il fit cacher soubz une table couverte d’un grand tapis pour ouyr tous ces propos : sur quoy fut icelle livrée à messieurs de la court qui, toutes les chambres assemblées, la condamnèrent à estre bruslée vifve, ce qui fut exécuté le mercredy quatorziesme de Juin 1600 ; tant sont les Princes peu assurez que, quand tout autre ennemy leur manque, la poussière est suffisante de s’eslever contre eux.

Il n’est hors de propos de mettre encor icy le foudre de Fontainebleau du premier aoust, au mes-