jusques à maintenir la bonne foy de monsr du Plessis partout où l’occasion s’en présentoit.
L’Evesque d’Evreux cependant publioit ses vanteries en ses sermons ; les Te Deum s’en chantoient par tout, mais Dieu se faisoit ouyr au dessus de toutes ces insolences. Le 21e de May, jour de Pentecoste, il prescha à Nostre Dame de Paris, le Roy présent, non sans grand applaudissement de luy et de toute la court, et continua les festes, et n’y furent oubliez ses prétendus triomphes ausquelz il se servoit luy mesme de trompette. Entre le jeudy et le vendredy prochainement suivant, qui estoient le 25e et le 26e, tomba la foudre dans la ditte Eglize, briza la chaire où il avoit presché, quelques siesges aussy dans le chœur de l’Eglize et quelques images, mesme brusla la robe et rompit la main d’une nostre Dame ; on ajoute pour certain qu’il emporta aussy le ciboire. Les chanoines et prestres celèrent tant qu’ilz peurent ce ravage, mais il fut sceu par ceux qui sonnoient les cloches qu’il avoit renversez, et est à noter qu’à ce mesme instant la foudre tomba au jardin des Tuileries.
Continua le sr d’Evreux à prescher le jeudy ensuivant jour du sacre, mais en l’Eglize St Germain de l’Auxerrois, paroisse du Louvre, et le lendemain le Roy luy fit répéter son sermon durant son soupper, mesme le fit soupper à une table près de luy, servy de ses viandes. La nuict ensuyvant, la foudre tomba encore sur S’ Germain de l’Auxerrois, rompit le marteau des cloches, et escarta les sonneurs, abbattit quelques images et emporta une partie de la couverture et du clocher, ce qui fut veu le matin
