ciles généraux, et ne souffriroient jamais la tenue ny convocation d’un concile national en France, ains excommunieroient tous ceux qui s’en mesleroient, qui estoit touteffois la voie la plus certaine pour venir, par la conférence des religions, à en accorder la différence. Aucuns luy avoient fait entendre que cela se pourroit fort bien faire soubz un Pape françois ; mais il fit connoistre, en l’estat des affaires de la Chrestienté et particulièrement de la Court de Rome, que difficilement y en pouvoit il avoir autre qu’Italien, que les Cardinaux les plus disposés à la Réformation en sont toujours devenuz ennemis venans à estre Papes, tesmoin Pie second, Hadrien sixième et autres ; et qu’au reste, comne disoit le cardinal du Bellay, à ceste chaire du filz de perdition, il y avoit une peste attachée qui infectoit incontinent ceux qui en apparence sembloient les meilleurs hommes.
Sa Majesté, de ce voyage, ne retint monsieur du Plessis que trois jours, parce qu’Elle entendit que les Députez de la Religion estoient jà annoncez à Saumur, lesquelz il désira qu’il vist premier qu’ilz se présentassent à luy ; et son intention estoit qu’ilz en choisissent six d’entr’eux qui l’allasent trouver à Mantes, les autres demeurans en corps à Vendosme. Touteffois, Elle trouva bon depuis, pour leur donner plus de contentement, de les voir tous ; monsieur de Bouillon arriva aussy à Chartres, presques en mesme jour, ainsy que par lettres il en avoit assuré monsieur du Plessis, et eurent moyen de communiquer des moïens de rendre fructueux le voyage des ditz députez pour l’avancement et manutention de la Religion.
