Page:Machaut - Œuvres, éd. Hœpffner, I.djvu/270

Le texte de cette page a été corrigé et est conforme au fac-similé.

1076Qui a vous et a moy besoingne.[1]
Or soit einsi fait par acort ;
Mais vous en ferez le recort
Dou prendre tel que vous vorrez.[2]
1080Contredire ne le m’orrez,
Eins y sui acordans dès ci
A vostre plaisir, sans nul si.[3]
Mes cuers y est ja tous entiers,
1084Car ce sera uns biaus mestiers
D’oïr les raisons repeter
Et les parties desputer[4]
Soutilment, par biaus argumens,
1088Qui vaurront auques jugemens. »

La Dame.

A ces moz prist la dame a rire[5]
Et en riant tantost a dire :
« Guillaume, bien suis acordans
1092Ad ce qu’estes ci recordans ;[6]
S’en parleray, comment qu’il aille.
Et nompourquant, vaille que vaille,
Je nomme et pren celui qui rois
1096Est appellez des Navarrois.
C’est uns princes qui aimme honnour
Et qui het toute deshonnour,
Sages, loiaus et veritables,
1100Et en tous ses fais raisonnables.
Il scet tant et vaut, qu’a droit dire,
Nul milleur ne porroie eslire.[7]
Li fais li sera savoureus,
1104Pour ce qu’il est moult amoureus,
Sages, courtois et bien apris.
Il aimme l’onneur et le pris

  1. M et moy
  2. M tel com
  3. E cy
  4. F despitter
  5. E Asses prinst
  6. D A ces mos que aies comptant
  7. B pourroit ; D esluire.