De requérir couardement.
Mais quant il a le don requis[1]
788 A celle a qui il est acquis,
Certes, désespérez seroit,
Si que jamais joie n’aroit»
Se ces damoiselles n’estoient[2]
792 Qui par leur force le resjoient.
Car cil qui la joie ont en garde
De ce se prennent si près garde
Que nuls ne te saroit despondre[3]
796 Le débat qui est au respondre :[4]
Car Dangiers orguilleusement
Respont et despiteusement
Tout premiers que celle requeste
800 N’est bonne, belle, ne honneste,[5]
Eins est outrages et folie ;
Et dit que moult bien emploiie[6]
Seroit une très grant vergoingne
804 A celui qui point ne ressoingne
Si haute joie a demander
Com celle qu’il devroit garder ;
Et moult est ore outrecuidiez,[7]
808 Quant il est de lui tant cuidiez
Que tels cuide estre et tant valoir[8]
Com pour la joie recevoir ;
Et dit qu’assez mieus ameroit,[9]
812 Qui de ce a chois le mettroit.[10]
Qu’on le pendist ou traïnast,[11]
Qu’on l’ardist vif ou escorchast,
Que ce qu’il fust en la saisine
816 De la joie qui tant est fine.
