XIIII.
De Pampre est couronné le chef du Bromien,
Et du Mirthe amoureux la molle Cyprienne,
Le Houx est consacré à la Latonienne,
Le Laurier est voué au pasteur Pithien :
Le funeste Cipres au dieu Thenarien,
Les œillets & les lys sont à la Florienne,
Les nourriciers êpicts à la Sillenienne,
Et au Dieu belliqueux l'arbre Dedonien.
Ru n'aymes le Pamprier, ny la folle amoureuse,
De t'abreuver de sang tu n'es point desireuse,
Mais tu as l'esprit vif, le courage hautain :
Il faut donc te vouër le Laurier, & le Chesne,
Il faut de mille fleurs t'esmailler une chesne,
Et pour nourrir les arts te consacrer le grain.
XV.
Si ce fut ta beauté qui fut mon homicide?
J'accuseray mes yeux trop hardis de la voir.
Mais quel tort ont mes yeux s'ils ont fait leur devoir,
J'en doy plustost blasmer mon esprit qui les guide.
Si tes graves discours par mon oreille vuide?
Ont assailly mon ame, elle qui a pouvoir
Sur ce qui est mortel, ne devoit recevoir
La cause de mes maux, d'une main si avide.
L'ame ne se repaist de tant de cruautez,
Mais l’œil tost aveuglé de si rares beautez,
Logea dedans mon cueur le mal qui me transporte.
Donques puis que l'Amour sceut entrer par mes yeux,
Pour s'emparer du cueur : si ne m'apporte mieux,
Je veux que par mes yeux hors de mon cueur il sorte.
