XCVI.
Quelle Nymphe est-ce là ? qui en face pallie,
Refoulle de ses pieds deux grands croissans de fleurs :
Et celle qui remplit un vase de ses pleurs ?
Quelles, quelles (passant) c'est Minerve & Thalie.
Dy moy de grace encor qui est celle qui lie
Ses pieds dessus son col en signal de mal-heurs :
Et celle qui du flanc arrache ses douleurs,
C'est la belle Ciprine, & la chaste Delie.
Quels apprests sont-ce là ? en ces pompes funebres,
D'un à qui son Soleil enfanta les tenebres,
Et le feit Citoien des Plutoniques lieux.
Pleurez, pleurez (passant) sa sentence cruelle,
Car helas il devoit pour son amour fidelle,
Ainsi que Caliston, est un astre de Cieux.
XCVII.
Ne fais point mon tombeau sur les portraits antiques,
Richement labourez d'un immortel labeur :
Qui pour digne loyer honorent la grandeur,
De ceux qui ont accreu le bien des republiques.
Qu'il n'y ayt al'entour ny frises, ny portiques,
Ny chapiteaux dorez, mais qu'en un champ d'azur,
Soient gravez ces six vers qu'exalle ma froideur :
Pour tesmoigner l'effort de mes flames pudicques.
Sou ce marbre icy gist un amant dont la Vie,
Fut de sa propre vie en vivant asservie :
Et par le seul trespas a sceu dompter la Mort.
Une maistresse icy tint son corps & son ame,
Et or qu'il est tapi sous la poudreuses lame,
D'Amour, de Mort, & d'elle, a surmonté l'effort.
