Si faz-ge, dist-il, par ma foi ;
Et tu, Renart, verse, si boi.
Si faz-ge, dist Renart, assez,
Mès vos, biau doz amis, bevez,
Que trop vos voi de boire lent,
Bevez un poi plus durement :
De boire vos voi recréu.
Dist Primaut, je boif plus que tu.
Non fez, dist Renart, par ma foi,
J’en ai bien béu plus que toi
Qui vaut la monte d’un fer d’asne,
Mès tien le henap, si di, have,
Conpaingnon, je te di guersai.
Par foi, dist Renart, je l’otrai,
Or verron qui est recréuz,
Et par qui ert plus tost béuz
Le vin, et le henap vuidiez.
Renart, fet-il, vos me cuidiez
De vin mater, mès non ferez,
Or verrai conment vos bevrez.
Vidiez le henap que tenez,
Puis l’emplez, si le me rendez,
Jà n’en iré à vos faillant.
Renart fet de boire semblant,
Tout le vin giete en son sain.
Cil qui n’a pas le cervel sain,
De rien nule ne s’aparçoit,
Renart le remple, et cil boit
Page:Le Roman du Renart, 1826, tome 1.djvu/149
Cette page a été validée par deux contributeurs.
