Cherée
Quoy vostre bien ?
Thrason
Pamphile.
Cherée
Est-elle à vous ?
Je n’ayme point à rire, et suis un peu jaloux :
Tréve de differend, ou vous verrez folie.
Thrason
De grace, contestons sans fougue et sans saillie ;
C’est belle chose en tout d’écouter la raison.
Je soustiens que Pamphile appartient à Thrason.
Chremès
Par quel droit ?
Thrason
Par l’achapt que l’on m’en a veu faire.
Enfin je suis son Maistre.
Chremès
Et moy, je suis son frere,
Qui n’ay soucy d’achapt, de Maistre, ny d’argent.
Thrason
On m’a tousjours tenu pour un homme obligeant,
Je le veux estre encor : allez, je vous la donne ;
Mais j’entens, pour Thaïs, que l’on me l’abandonne.
Phœdrie
Encor moins celle-cy
Thrason
Que sert donc nostre accord ?
Phœdrie
J’ay l’esprit trop jaloux, je vous l’ay dit d’abord,
Et ne sçaurois souffrir seulement qu’on la nomme.
