Cette page a été validée par deux contributeurs.
Mes drapz, en dormant, ne veillant ?
A nul, tant soit mon bien vueillant,
Je ne les eusse point accrues…
Par le sang bieu ! il les a eues…
Et, par la mort ! non a, ce, ce tiens-je,
Non a !… Mais à quoy donc en viens-je ?
Si a, par le sang Notre-Dame !
Meschoir puist-il de corps et d’ame,
Si je sçay qui sçauroit à dire
Qui a le meilleur ou le pire
D’eux ou de moy ! Je n’y voy goute !…
Scène IV.
PATHELIN, GUILLEMETTE.
Pathelin, à Guillemette.
S’en est-il allé ?
Guillemette.
Paix ! J’escoute
Ne sçay quoy qu’il va flageollant.
Il s’en va si fort grumelant,
Qu’il semble qu’il doive desver.
