« Que mosenher lo coms sai defors vos atent ;
« A totz los baros platz lo vostre acordament. »
No sai plus que vos dia pluzor alongament :
Lo coms i es ichitz can la razon entent,
Be sap que no i a gaire pus de defendement ;
Lo castel lor rendè cant venc al feniment,
La vitalha que i era, pan e vi e froment ;
E el tuit s’en ichiron ab los lors garnimens.
Sobrels sans evangelis lor feiro sagrament
Que mais no guerregessen crozadz a lor vivent,
Ni que no mantenguessen l’avol gen mescrezent.
E ab aitant gurpiron lo castel e van s’en
Ves lai don son vengutz.
La ost tornè atras de lai don so vengut,
E prezon Rabastencs, Galhac e Montagut,
E trastot per paor lor o a om rendut,
La Garda e Poi Celsi ; é puis si son venut
[C]els de Sent Chantoni ses arma e ses escut,
E ab lor s’acorderon co ome aperceubut.
La Guepia e Pui Celsi son desotz lor tenut.
Tant com tenc Albiges an elh be comquezut.
E l’evesques qu’es pros e bos, si Dieus m’ajut,
S’es de trastotas res ab lor ben avengut.
- ↑ — 1700. Sent Chantoni, pour Sent Antoni, comme Saint-Chamant (S. Amantius), Saint-Chinian (S. Anianus), Saint-Chély (S. Electus), etc. ; cf. Mabille, Bibl. de l’Éc. des Ch., 6, III, 492 ; Bréal, Romania, II, 329. — 1703. comquezut, ms. comquerit. — 1704. Réd. en pr. : de la quala reduction de pays l’evesque d’Alby es estat causa, car avia trabalhat fort et grandamen per lodit Montfort (p. 37).
