Que tornec la crozada co fai mantas sazos.
Lo coms anec a Roma, si com ditz la cansos,
El cossol de Tolosa, que i feiren grans messios.
Primer s’en vai en Fransa e troberon joios
Lo riche rei Felip, mas pois fo cossiros ;
Per l’emperador Otes lor fo apres felos.
La comtessa de Campanha que es corteza e pros
Sela los receub ben e motz d’autres baros,
El pros dux de Bergonha quelh presenta mans dos ;
E lo coms de Nivers li fo mot amoros,
El fe mant bo ostal.
L’apostolis de Roma e tuit li cardenal
Lo receubro mot be cum baro natural.
Lo papa li done .I. mantel principal
E un anel d’or fi, que sol la peira val
.L. marcs d’argen, e pochas un caval.
Ladonc devengro els mot bo amic coral.
Mostrelh la veronica del Paire esperital ;
Can ne toquè la fassa, que sembla om carnal,
Totz sos pecatz li sols que a faitz terminal,
Car tals foron da .l.c. comunal
Amdoi cela vegeia.
- ↑ — 993. Sic, leçon corrompue.
— 983. Mant, corr. mot ? Après ce vers prend place dans la réd. en pr. (p. 23) un développement d’une douzaine de lignes, où il est dit que chacun des seigneurs visités par le comte, et le roi de France lui-même, écrivirent en sa faveur au pape. Il n’y a pas de doute que ce supplément d’information est de l’invention de l’auteur du remaniement.
