Ab afortitz coratges se son si captengutz
Que la nog e lo dia son entr’els contendutz ;
Mas en petita d’ora lor es tals mals cregutz
Que jamais lo dampnatges no sira revengutz :
Que l’avesques de Santas que la crozada adutz
En Wmes. de Rocas lo senescalcs temutz,
Que menan las cumpanhas els avers els trahutz,
Per tot a la redonda on es lo camis batutz,
An los traps e las tendas els pavalhos tendutz,
E pel meg loc de l’aiga lo naveis espandutz.
Apres no tarzec gaire qu’es lo temps avengutz
C’ardimens e folatges los a totz deceubutz,
Quel filhs del rei de Fransa lor es aparegutz,
Ez a en sa companha .XXV. melia escutz
De cavaliers mirables ab los cavals crinutz ;
E foron li .X. melia ilh els cavals vestutz
Del ferr e de l’acier qu’es resplandens e lutz,
E de cels c’a pe foron es lo comtes pergutz ;
E menan las carretas els arnes els condutz,
E perprendon las plassas e las ortas els frutz,
E lo reis ab gran joya es al trap dechendutz.
Can per lor de la vila es los reis conogutz,
Ges non es meravilha si foron desperdutz :
Cascus ditz el coratge que ja no fos nascutz.
La primeira batalha qu’ilh los an combatutz
Los fossatz e las [l]hissas lor an pres e tolgutz,
Els pons e las barreiras debrizatz e fondutz ;
Ez apres la batalha es parlamens tengutz
Per que cels de la vila cujan estre ereubutz,
— 9242. a, ms. al. — 9243. Ms. mirabbles. — 9248. Dessin représentant une ville assiégée ; rubrique : Le seti de Marmanda cant le filh del rey de Fransa la pres.
