El vescoms de Lautrec qu’es en la preicha intratz ;
E li Frances essems son el camp refermatz :
Chatbertz e n’Aimirics el bos Rogers Bernatz,
Lops de Foish en W. de Niort qu’es nafratz,
E i es Br. Amiels el tos W. Bernatz,
E n’Amalvis e n’Ucs de la Mota prezatz,
Ez ab lor de Tholoza quels an be aziratz,
E li baro del comte tug essems az un clatz
Si trencan las batalhas ab los aciers colatz
Que per totas partidas los an voutz e viratz,
Que los feron els nafran pels peitz e pels costatz ;
E li Frances trabucan dos e dos enversatz.
Ab tant venc la grans preischa dels sirvens acolpatz,
Que dins en la batalha son ab lor encarnatz,
Qu’entre l’acier el glazi abatutz e sobratz
Cavaliers e sirvens tug essems remesclatz
Les an mortz e vencutz e destruhs e trencatz,
Que d’olhs e de cervelas e de punhs e de bratz
E cabelhs e maichelas e membres amaitatz,
E fetges e coradas departitz e cebratz,
E sancs e carns e glazis espanditz a tot latz ;
Que lai ac tant Frances mortz e deglaziatz
Quel camps e la ribeira n’es vermelhs e juncatz.
Mas lo vescoms de Lautrec en es vius escapatz,
En Folcautz en Johans en Titbautz son triatz
E retengutz a vida e rendutz e lhivratz,
E li autri remano el camp martiriatz.
Lai fetz aital miracle la vera Trinitatz
Que de la part del comte non i es hom dampnatz,
Mas cant us escudiers que s’era aprimairatz,
— 9180. El, ms. E lo. — 9186. aziratz, corr. ajudatz ? — 9192. Corr. acoplatz, ou acorsatz ?
