Rodrigos e li autre quels an e[s]peronatz ;
E li baro cavalgan apres lor assignatz,
Las senheiras baichadas els penos desplegatz.
En Folcaut de Brezi los a ben esgardatz,
E vic las entresenhas dels baros presentatz,
E perpren la ribeira e ditz al sieus : « Estatz ! »
Belament los ensenha e a los sermonatz :
« Senhors baros de Fransa el meus rics parentatz,
« Dieus e ieu e la Gleiza vos te asseguratz
« Que paor ni temensa ni regart non aiatz.
« Aiso es lo coms joves que nos a aziratz
« E lo pros coms de Foish quez es mals e senatz,
« E veus Roger Br. els baros ajustatz,
« Ez an los capdaliers els faizitz amenatz ;
« E s’il so bo per armas nos valem mais assatz,
« C’aisi es tota Fransa e Monfortz aturatz,
« El melhs d’aquesta terra e la flor dels Crozatz ;
« E si negus moria totz nos ha perdonatz
« L’avesques de Tholoza e mosenhel legatz.
— Bels fraire, » ditz Johans, « de be ferir pessatz,
« Que per estas miraclas de nos e dels crozatz
« S’aura hoi a combatre la merces el pecatz. »
Ditz lo vescoms de Lautrec : « Senhors, mi escotatz :
« Hieu ai be las personas els baros albiratz
« E semblara folia si aisils esperatz.
— Vescoms, » so ditz Titbaut, « sius voletz, von anatz :
— 9094. Ms. Lodrigos. — 9097. En, ms. El. — 9105. Réd. en pr. « Senhors, aissi aven lo comte jove et lo comte de Foix, amay son filh Rogier Bernard, et aytamben lo comte de Cumenge que mena la batalha » (p. 107). — 9119. Réd. en pr. Et adonc a respondut lodit Folcaud : « Senhor vicomte, si vos aves paour, ieu vos conseilhi que vos enfugiscas, car nos atenden aissi nostres ennemics,
