« E podetz be conoicher cols a Dieus aziratz :
« A mort e a martiri les nos a amenatz.
— Senher coms, » ditz n’Arnaut de Vilamur, « sius platz,
« En aquesta batalha no seriatz hondratz.
« Nos tanh de vostre par c’ab lor vos combatatz,
« Si n’Amaldrics no i era, o coms o pozestatz.
« N’Folcautz es pros e savis, mas no i es la rictatz
« Per qu’en est’ aventura lo vostre cors metatz :
« Empero, sil prendetz, gaire no i gazanhatz,
« Que no n’auriatz terra ni acordier ni patz.
« Pero si la batalha vos agrada eus platz
« A destre e a senestre me trobaretz al latz.
— N’Arnaut, » so ditz lo coms, « per que m’en castiatz ?
« Hieu fare[i] la batalha eus prec que la vulhatz,
« Que cel que ara m’en falha n’er totz temps encolpatz :
« Que totz hom cals ques sia, si era reis coronatz,
« Deu metre en aventura son cors e sas rictatz
« Per enamics destruire trols aia abaichatz.
« E pessem d’est lengatge com sia milhoratz. »
So ditz lo coms de Foish : « Senh’en coms, a mi datz
« La primeira batalha dels pus afazendatz. »
E lo coms li respon : « Vos en Roger Bernatz
« Ab lor de Carcasses, car los sai bos armatz
« E firens en batalha e ben aventuratz,
« E cels de vostra terra, en cui melhs vos fizatz,
« Ez ab vostra companha, aital com la aiatz,
« Lor faretz la batalha, e prec que bels firatz.
« Els baros de ma terra qu’ieu ai ben esproatz
— 9047. eus, corr. e vos.