« E ges nous tenc per savi car tan fort la menatz
« Enans que torn areire cug be que la pergatz.
— En Folcaut, » ditz lo coms, « d’aiso volh quen crezatz
« Que, per santa Maria don Jhesu Crist fo natz,
« O ieu prendrai Tholosa ans de .VIII. jorns passatz,
« O ieu sirei al prendre mortz e martiriatz. »
So ditz n’Ugs de Levi : « No siretz, si Dieu platz. »
E laïns en Tholosa es lo cosselhs triatz
Dels baros de la vila e de las poestatz,
Cavaliers e borzes entendutz e celatz.
Ez a dig l’us a lautre : « Oimais es temps as[s]atz
« Que sia lor o nostra tota la heretatz. »
Mas entre las personas, car es gent enparlatz,
Parla, dicta e sermona lo maestre Bernatz,
Es es natz en Tholosa e dels endoctrinatz :
« Senhors franc cavalier, escotatz me sius platz :
« Yeu soi be de Capitol, el nostre cossolatz
« Esta la noit el dia garnitz e acesmatz
« De complir e d’atendre las vostras volontatz.
« E car floris e grana l’amors e l’amistatz,
« Que nos e vos el conte e Paratge amparatz,
« Volh vos monstrar e dire, per so qu’o entendatz
« Ins el vostre coratge, on ira est dictatz.
« Acra fo asetjada enviro per totz latz,
« E tenc la be a seti nostra crestiandatz ;
« Mas en petita d’ora li falhic vis e blatz.
« E lo reis Saladis, qu’era fort aturatz,
— 8233. Ms. m. o m. — 8240. Rien de ce discours dans la réd. en pr. — 8241. En marge : Asi feron cosel a Toloza quan mastre (sic) Bernat capitol va parlar. — 8249. so, ms. se ; Fauriel re.
