« De l’aver de Tholoza quem donatz a doblier.
« E si prendetz la vila n’ieu mezeis la comquier,
« Totz l’avers sia vostre, que ja part no von quier.
« E si m’en voletz creire, ans o faretz estiers :
« Que a mi ni als autres non donetz .I. denier
« Tro que pagat ne sian tuit vostre soldadier.
« Mas de la perparansa vos darai bo loguier :
« Que si prendetz Tholoza d’aquest .I. an entier,
« Can l’auretz comquerida ieus dare[i] Montpeslier.
« Que, per santa Maria, a mi comtec hom her
« Que ilh an dins la vila tot cant que an mester,
« E bon cor e gran forsa e senhor dreiturer.
« E valon tant per armas e son tant bon guerrier
« Que cant vos lor datz glazis ilh vos redon carnier.
« Nos em d’estranha terra, novel penedenser,
« E servirem la Glieiza de grat e volentier
« Tota la carantena trol termini derrier,
« E poish tornar nos n’em per aquel eish sender. »
Tant parleron essems tro al loc domengier
On lo coms de Montfort tel seti frontalier.
E laïns en Tholoza estan en cossirier
Car de motas partidas son l’enemic guerrier,
Que totz crestianesmes los menassa els fier.
Mas lo filhs de la Verges per donar milhorier
Lor trames una joya ab un ram d’olivier,
Una clara estela el luga montaner :
Lo valent comte jove, clartat ez eretier,
Intra permeg la porta ab la crotz e l’acer.
Mas Dieus li fe miracle e signe vertadier
Qu’el metra en cadena lo leo glazier,
— 7918. En marge : Aisi intra lo comte jove a Toloza.
