« Senhors, » so dit lo coms, « ben ai dreg e razon
« Que mi e totz vos autres meta en ramizon,
« Cum ieu cobre Toloza els baros que lai son.
« E prec Dieu que lam renda o que la mort mi don,
« Car m’an ins el cor messa la ira e la tenson,
« Qu’ieu no los posc combatre ni no sai cum eston ;
« E no posc mais suffrir la granda mession,
« Car li mieu soldadier m’an dig ara de non,
« E las autras companhas, car ieu non ai quels don.
« Mas, si m’en voletz creire, ieu darei cosselh bon :
« Hieu fas far una gata, anc tan bona non fon
« Formada ni bastida des lo temps Salamon ;
« E no tem trabuquet ni peirier ni cairo,
« Quelh soler e las alas el trau el cabiron
« Elh portal e las voutas el fial e l’estaon
« Son de fer e d’acer tuit lassat environ.
« Quatre cens cavalier[s], dels milhors c’ab nos son,
« Cent [e] .L. arquiers complitz de garnizon
« Metrai ins en la gata, e nos tug a peon,
« El fossat de la vila la metrem el fondon,
« E can siran essems li filh e li pairon,
« Entrels brans e las massas farem tal chaplazon
« Que de sanc ab cervelas banharem mon leon.
« Ez ieu metra[i] Toloza a foc e a carbon,
« O recebrai martiri e mort e passion.
— Coms, » ditz lo cardenals, « santa Gleizaus somon
« Que non aiatz temensa ni mala sospeison,
« Qu’ela a poder qu’eus tola e ha poder queus don,
« E poder queus defenda e poder queus perdon ;
« E si be la sirvetz auretz ne gazerdon.
— 7835. lai, ms. laïns. — 7847. Sic. — 7857. e ... e, ms. o ... o.
