Els camis e las plassas e los ortz els vergers,
Que per meja la vila intrec ins els celiers,
Aisi que sobre l’aiga no remas pons entiers,
Ni molis ni paichera ni pals ni alabers.
E mieja de Garona, on els fils montaners,
Ac doas tors garnidas els dentelhs batalhiers
Dels homes de la vila, de bos e de leugiers ;
E cant l’aiga s’amerma e [es] lo flums engaliers,
Lo rics coms de Montfort, qu’es mals e sobranciers,
Ab sa granda crozada e ab sos grans mainaders,
El perpren la ribeira e los pratz els gravers,
E mes en l’Ospital los valens soldadiers
E las bonas companhas e los arbalestiers,
E fe bonas clauzuras e los valatz raziers,
Els murs e las arqueiras els covinens solers
On el leos malignes el sieus gonfanoniers,
E conduitz e vianda a moitz e a sestiers ;
E trames los mesatjes correns e viacers,
Que per Agenes venga lo bels naveis corsers ;
Ez en la bela plassa on s’espan l’areniers
El bastic los calabres e desobrels targers,
Que vol la tor abatre ez aver los torrers.
E laïns en Toloza es grans lo desturbers
El trebalhs e la ira el mals el caitiviers,
E paors e temensa d’omes e de molhers ;
E si ditz l’us a l’autre : « Jhesu Crist merceners,
« Vos gardatz las dreituras de vostres dreiturers ! »
E las donas descausas van orar als mostiers,
— 7579-80. Réd. en pr. et al pont de S. Subra no demourego que las duas tours, en lasqualas avia bona garniso de los de la vila (p. 98). — 7582. Corr. el f. es e. ? — 7590. Ms. On el n leo. — 7601. Ms. gardartz.
