« Tant so mal e felo e gualhart e metent
« Que totz lo mons i troba batalha e content.
« Tant soi iratz e fels que[l] cors me part em fent :
« Cant ieu creisse de forsa ilh creiso d’ardiment ;
« E per la lor ondransa e pel meu baichament
« An creguda la vila aisi novelament.
« S’ieu no posc cosselh prendre al lor cofondement,
« Petit pretz ma valensa el vostre acorrement ;
« Mas, si m’en voletz creire, ilh son al feniment.
« Per destruire la vila e prend[r]el venjament
« No[s] farem autre seti outra l’aiga rabent,
« Que negus d’els no i intre ni n’esca solament.
« E tindrem es dos setis aisi tant longament
« Tro quels prendrem per forsa, que sian recrezent. »
Tota la ost essems autrejan est coven,
E laichero el seti lo bo[n] establiment,
E li autre passeron a Murel verament,
Et agro pro vianda e adreit compliment.
E lo coms s’en levet a l’alba pareichent,
E fe sonar las trompas e garnir subtilment,
E perprendo la plassa e l’autre mandament.
Li ausberc ab cubertas e li bel escut pent,
E la clartat dels elmes e las boclas d’argent
E li caval d’Espanha e li capel luzent
E las senhas de pali e li gonfano tent
E li corn e li graile e las trompas el vent
Fan brandir la ribeira, l’aiga e l’element ;
E cavalgan ensems tant ergulhosament
Quels baros de Tholosa los viron a prezent.
E feiron de lors eiches aital meitadament
— 7473. que, corr. o ? — 7478. levet, ms. leva.
