« En aquesta vegada devetz tant envazir
« Que anetz autre seti novelament bastir
« Jos al fons de la vila per melhs apoderir,
« Que per nulha partida no[ns] poschan sobre issir ;
« Pois farem los laïns jejunar e languir.
« E si ieu posc la vila nils baros convertir
« Totz l’avers sera vostre e l’onors a partir,
« Que de re que lai sia no vulh mais retenir,
« Mas cant sola la vila els baros destruzir. »
Tuit li baro l’escoutan e prendo a grondir ;
N’Amaldric del Crio li respos al fenir :
« Per Dieu, bel senher coms, fort vos deu hom grazir
« Car en tant pauca d’ora nos voletz enantir ;
« Mas abans c’aiso sia, vos volem als querir :
« Que nons vulhatz decebre ni nons cujetz onir,
« Que totz om, cant se coita, tart es al repentir ;
« Car nos el caval nostre em tuit las del venir,
« Per que ja no poiriam lo maltrait sostenir,
« Que totz om can es febles re no sab on se vir.
« Mas que tant nos voletz amar e enantir,
« Vos nos laisatz la vila c’avetz faita garnir
« En quens puscam pauzar e manjar e dormir,
« Quels baros de la vila no nos fassan sortir :
« Vos conoisetz la vila e l’intrar e l’issir,
« E en cantas de maneiras los poiram adaptir,
« E tinetz aquel seti que nos mandatz tenir.
« E, per santa Maria, ieu aug comtar e dir
« Quel baros de Toloza son greu per adontir ;
« Que sils vol om combatre nils cuja envilanir
« Fort bes sabon combatre e durament ferir.
— 7385. del Crio, ms. deloria ; réd. en pr. n’Amalric de Crio (p. 97).
