« Que conoscan dreitura, els ne lais penedir !
« Car per aital nos mandan dampnar ni destruzir
« Que de sa senhoria nos volem departir,
« Per una gent estranha que fal lum escantir ;
« E si Dieus e Toloza o volgues cosentir
« Tot Pretz e tot Paratge agran fait sebelhir.
« El Senher qui capdela es gardec de mentir,
« E fe l’orgolh abatre e fels angels salhir,
« Nos do poder e forsa del senhor mantenir !
« Qu’el es d’aital natura c’ab sen e ab albir
« Que deu amar la Glieiza e la terra tenir. »
Dins la kalenda maya, cant pres az abelir,
Lo cardenals el coms fan carpenters venir
Per comensar la cata ab quels voldran delir,
Els castels els calabres els peiriers amarvir.
Ab tant veos .I. messatge quels a faitz esbaldir ;
Belament ditz al comte : « Anatz tost reculhir
« L’avesque e la comtessa que venon ab desir,
« E en Michel dels Armes que fai la ost brandir,
« Gauter de la Betona, en Wlme Melir.
« Oimais nons pot Tholosa defendre ni gandir,
« Que totz vostres dampnatges, lor podetz car merir,
« Que ara ve tals crozada qu’en levara .I. tir,
« Car ilh son be .C. .M. que la faran brandir.
— Oimais, » so ditz lo coms, « nom pot res dan tenir. »
E anec los recebre e si eis peroffrir ;
E demenon tal joia can foron al venir :
« Senhor, » so ditz lo coms, « res nous i pot falhir,
— 7330. Que, corr. El ? — 7338. Ms. Michels. Corr. de Harnes ? Ce nom, qui reparaît au v. 7505, manque, de même que les deux du vers 7339, à la réd. en pr. — 7339. Ms. Wlmes. — 7343. Ms. .C. o .M.
