« E pos la santa Glieza no defen se ni nos,
« Mens ne val sa valensa el sieu nom precios.
« Perqu’ieu vos prec, car Senher, planhens e cossiros,
« Qu’aram venga la mortz o tals milhurazos
« Qu’ieu conquera la vila en sia poderos ! »
Ab tant lo coms s’en intra iratz e corrossos.
Els baros de la vila s’en repairan joios,
E ditz laüs a l’autre : « Jhesu Crist es am nos,
« Quens garda ens governa.
« Jhesu Crist nos governa e devem li grazir
« Lo mal el be quens dona e dousament sufrir,
« Car per aital dreitura nos pot ben mantenir
« Qu’en la sua crezensa volem vivre e morir,
« Car nos crezem lo Dieu quens garda de falhir,
« E que fetz cel e terra e granar e florir,
« El solelh e la luna per lo mon resplandir,
« E fe ome e femna els esperitz noirir,
« E intrec en la Verge per la leg acomplir,
« E pres en carn martiri per pecadors garir,
« E dec sanc preciosa per l’escur esclarzir,
« E anec al seu paire e al Sen Esperit offrir ;
« E pel sant batisteri recebre e complir,
« E per la santa Glieiza amar e obezir,
« Devem be Jhesu Crist e s’amor conquerir.
« El senhor apostoli quens devria noirir,
« Els prelat[z] de la Glieiza quens jutjan a morir,
« Don Dieus sen e coratge, escient e albir
- ↑ — 7308. Ms. solhel. — 7317. Ms. senher. — 7319. Ms. Dont.
