E feric de sa massa, car es cavaliers bos.
Ab tant ilh de la vila de l’issir talentos
En auta votz escridan : « Baros, segudam los ! »
Cavalers e sirvens e borzes e peos
Ieison de las trencadas e perprendon l’erbos,
E dedins e defora creis la defensios.
Entrels corns e las trompas e los grailes els sos
Trembla l’aiga e la vila e lo castels el tros ;
E lai on s’encontreron levas la contensos,
E fo cridatz Belcaire ! Tholosa ! e Avinhos !
Li bran e las gazarmas, li cairel els brandos,
Las lansas e las massas, las peiras els cairos,
E li dart e las apchas, las picas els bastos,
E la[s] sagetas doblas els caireletz dels tos
De tantas partz lai vengon a present e a rescos
Non i es tan malignes que no sia doptos.
En Peire de Vezis los fer voluntairos,
E ilh feriron lui que l’abateron jos,
E laichet son caval e repairet als sos ;
E venc Peire, sil pres per las regnas amdos,
E escrida : « Toloza ! baros, atendam los ! »
E fer .I. cavaler quel falset los brazos :
Si l’abat el trabuca qu’en fremit lo campos.
Mas Simos Galoers, bels cavalers e pros,
Lo filh del manescalc qu’era valens e pros,
Montfort ! Montfort ! escrida, e durament fer los,
E abat e trabuca sirvens e donzelos.
De tantas partz lo feron el ostal glazios
Que remas en la plassa debrizatz a trensos.
Bertran de Pestilhac, de ferir cobeitos,
— 7250 et 7255. Ms. feri.
