« Els omes e las femnas e las gentils maizos
« Passaran per las flamas e devindran carbos. »
Tuit li baro l’escoutan, que degus no i respos ;
Mas Robertz de Belmont li es contrarios :
« Per Dieu, nostre car paire, esta salvatios
« Nous cal de nos a dire ni prometre perdos :
« Que, per santa Maria maire del glorios,
« Ans que prengam la vila per ditz ni per sermos,
« Entre colps e coladas e plagas e tensos
« Saubra Dieus e Diables cals esperitz es bos. »
E mentre que ilh parlan e mostran lor razos
Vengo permei las plassas, punhen del[s] esperos,
Li baro de Tholosa firen e coratjos,
W. Unaut en Guiraut e n’Ucs Bos
E l’adreitz n’Amalvis, en W. Arnaudos,
El pros n’Ucs de la Mota el sieus vermelhs leos,
E las gentils companhas, joves e deleitos ;
E portec la senheira l’adreitz n’Ugs de Pontos,
Qu’a la porta del seti li bandejal penos.
Dedins per las albergas es lo critz el resos,
Que tota l’os[t] en trembla e desus e dejos.
En auta votz escridan : « Santa Maria, val nos ! »
E coron a las armas e a las garnizos.
Mentrel coms de Montfort se arm[a] ab los sos,
Per los camps de lafora es la chaplatios,
Que detrencan e talhan los Normans els Bretos,
— 7183. nos, ms. plutôt uos. — 7188. Réd. en pr. Or dis le conte que quand lo bon temps es vengut, lo C. de M. a fait autre cop metre le sety aldit pla de Montolieu devant Tolosa, vesen loqual los de la vila son salits, et sus lodit sety son venguts frapar de tala poissansa que no laissaven res que tout no ho metessen a mort (p. 96). — 7191. Sic, un nom a sans doute été oublié. — 7193. el, ms. els. — 7203. Ms. detrengan.
