« Que mortz, cant es ondrada, val mais que caitivers !
— Per Dieu ! en Gui, » ditz n’Alas, « car vos etz merceners,
« E bos amics del comte vulh que intretz primers,
« E sil coms es segons ieu sirai lo tersiers.
— N’Ala, » so ditz lo coms, « ja no er fait estiers
« Ad aquesta vegada.
« Ad aicesta vegada er en aisi complit
« Que a l’albor del dia nos sirem tuit garnit
« Ab totas nostras armas, e li bo arabit,
« E aurem nostr’engenh celadament bastit ;
« E las melhors mainadas e li pus escarit
« Comensaran la guerra tro qu’els sian ichit.
« E cant ilh seran fora per lo camp espandit,
« Nos vindrem tuit ensemble aisi apoderit,
« Ponhen e combaten e firen e aizit,
« Qu’entre l’acier el glazi sirem si departit
« Qu’enans qu’els se remembron ne sian avertit
« Nos intrarem ensemble ab lor tant afortit
« Que retendrem la vila o i remandrem fenit.
« Mais val morram ensemble o que siam guarit
« No que tengam lo seti tant longamen aunit !
— Senher, » ditz n’Amaldric, « mot ben o avetz dit,
« Ez eu ab ma mainada comensarai l’ardit. »
Can del cosselh partiro an manjat e dormit,
- ↑ — 6978. Melhors, ms. memors. — 6983. Corr. seran ? — 6984. Ms. siam.
— 6972. Contre-sens dans la réd. en pr. : Adonc lo C. de M. a dict.... qu’el no se faria pas ainsin qu’els disen, car el bol que dema... (p. 95).