« Quens fan .I. sobros naicher que nons agra mestiers.
« E car sufri Tholosa mans mortals enugers,
« Ges non es meravilha s’es faitz lo recobriers.
« E car ne fe senhors garsos e pautoniers,
« A nos totz e al comte n’er donatz tals loguiers
« Que totz nostres linatges pecaran els semdiers.
« Car cel qui tol e dampna e aucil domen[g]iers
« Deu portar foc e ira e sufrir estremiers ;
« Per qu’es en aventura lo nostre milhorers.
— Coms, » ditz en Gui de Levi, « lo parlar es leugiers,
« Que cant creis lo dampnatges amermal thesauriers.
« E l’afars d’aquest seti no es mas alonguiers.
« Ja tant non emprendretz ab vostres ligendiers
« Que no i trobetz contenta d’aquestz .X. ans entiers.
« Mas, si m’en volet[z] creire, faitz er lo delivrers :
« Al mati, pla a l’alba, cant la sonal torriers,
« Vos aiatz fait garnir totz vostres chivalers
« E las bonas companhas e vostres escudiers
« E los corns e las trompas e totz los senharers ;
« Et es l’iverns cozens e mais e freitz e niers,
« E li ome jairan els lietz ab lors molhers :
« E mentre que demando los vestirs els cauciers,
« Metrem en aventura los corses els destriers,
« E intrem los passatges o passem los semdiers
« Dreitament a la porta per aucirels porters,
« E per tota la vila se relevel chapliers
« E lo critz e la noiza e lo focs el carniers
« E la mortz e lo glazis e la sanc el flamiers,
« E de nos o de lor sia lo jorns derriers,
— 6946. Ms. estreners. — 6948. Erreur de personne dans la réd. en pr. : Adonc a parlat lo comte Guy et a dict : « Senhor mon fraire.... (p. 95).
