Que de la part en oltra li a l’acier colat.
Aicel cai e trabuca, ez el an l’en levat.
E ditz li .I. reproverbi : « Beus cug aver fissat,
« Pero, car etz mos gendre vos darei lo comtat. »
E escrida[n] Tholoza ! que l’orgolh es bais[s]at ;
E Cumenge ! pel comte, Foig ! per en Roger Bernat,
La Barta ! per n’Esparc, e per n’Ot Sant Beat !
Montagut ! e la Islha ! Montant ! e Monpezat !
E a las entresenhas an lo chaple levat ;
Mas li dart e las lansas el cairel empenat,
E peiras amarvidas e espeut nielat,
E flecas e sagetas e li basto cairat,
Els trensos de las astas el cairo reversat,
D’entr’ambas las partidas lai vengo afilat,
Coma ploja menuda per tot entremesclat,
C’a penas pogratz veire de blanc cel la clartat.
Ladoncs pogratz vezer mant cavaler armat,
E mot bon escut fendre e ubrir mant costat,
E manta camba fraita e mant bratz detrencat,
E mant peitz escoichendre e mant elme brizat,
E manta carn perida e mant cap meitadat,
E manta sanc esparsa e mant brazo trencat,
E mant baro combatre e mant afazendat,
Que l’us ne porta l’autre cant lo ve reversat.
E mantas de maneiras son ferit e nafrat,
Qu’entre blanc e vermelh lo camp an colorat.
En Guis lo manescalc ditz al comte a celat :
pr. et a lo attench per lo miech de las doas queyssas, talamen que totas doas las ly a traversadas de part en part (p. 91). — 6379. Que, corr. E ? — 6380. En marge : Aici fo ferit Gui le frayre del comte. — 6387. a, corr. ab ? — 6395. L’idée ne semble pas complète : p.-ê. manque-t-il un vers ? — 6400. Ms. brezo.