Per defendre las lissas que hom non venga als pals ;
E per mei las arqueiras e per los fenestrals
Los arquiers que defendo los ambans els costals,
Ab arcs de mantas guizas, balestas e manals ;
De cairels ab sagetas son las plenas semals.
Pertot a la redonda lo pobl’es generals
Que tenion las apchas e massas e tinals,
Las donas e las femnas que portan els grazals
Las peiras amarvidas, e grandas e punhals.
La vila es establida belament pels frontals ;
Els baros de lafora belament e engals,
Ab foc e ab escalas e ab peiras faichals,
E mantas de maneiras perpendo los bocals.
En Guis, en Amaldrix, en Sicart, en Folcaus,
Garnitz de totas armas i van gent primairals,
Ab lor bela companha tro foro prob dels vals.
La batalha s’aprosma el perilhos jornals,
E Dieus gart la dreitura !
E Dieus gart la dreitura, que sab la veritat !
Quel cardenals els bisbes el precios diptat,
E l’abas el prebosdes, l’avesques elh letrat
Pregan santa Maria e vera Trinitat
Que defenda la vila segon que son dampnat,
E que gart la dreitura e la lor leialtat,
El comte de Monfort ab son gentil barnat
E la sua senheira el leo entalhat.
- ↑ — 6347. Ms. E lo coms.
— 6327. Corr. p. las s. ? — 6340. Dessin représentant un combat de cavalerie.
