Cel recep las paraulas e met se el semder.
El baros de la vila remazo el terrer ;
Ez en la bela plassa, pres del mur bathalher,
Fan lissas e barreiras e ric mur traverser,
Cadafalcs e arqueiras e bocal senestrier,
Perques fassan garidas devas la part derer
Pels cairels que lansavan del castel li arquer.
E anc e nulha vila no vis tan ric obrer,
Que lai obran li comte e tuit li cavaler,
E borzes e borzezas e valent marcadier,
E lh’home e las femnas els cortes monedier,
E li tos e las tozas el sirvent el troter :
Qui porta pic o pala o palagrilh leugier ;
Cascus a la fazenda a lo cor viacer.
E la noit a la gaita son tuit cominaler ;
Estan per las carreiras li lum el candeler,
E las tambors els tempes e grailes fan temper ;
Las tozas e las femnas per lo joi vertader
Fan baladas e dansas ab sonet d’alegrier.
E lo coms s’aconselha e l’autre capdaler ;
E an triat Capitol, car i a gran mester,
Per guovernar la vila e pendre milhorer ;
E per sos dreitz defendre an elegit viguer
Bo e valent e savi, adreit e plazentier.
E l’abas el prebosdes cascus ret so moster,
E fo ben establida la pena e lo cloquier.
— 5960. Estan, corr. E van ? — 5967. Réd. en pr. et tant an parlementat que, per deliberation deldit conseilh fouc arrestat que en ladita villa se faria et crearia ung viguyer, et aysso per aver la gouvernation de ladita villa, et donar ordre en so que calria far ; so que fouc fait, et creat lo premier viguyer que jamais foguessa en Tolosa (p. 87-8).
