« Senhors, a totz vos autres e a Dieu son clamans
« Dels baros de la terra que so fals e truans ;
« Totz lo cors me sospira e m’es greus e pezans
« Car aisim dezereta us tozetz de .XV. ans :
« Ses poder e ses forsa e ses aver donans
« M’a gitat de Proensa e m’es tant contrastans.
« E sobre tot dei estre fortment meravilhans,
« Pos Glieiza la m’autreja e los meos auribans,
« Car me cridan Tholoza ! al ferir e al lans ;
« Ez eu fas de la Glieiza los faitz els ditz els mans.
« E car el es pecaire ez eu soi mersejans,
« Fasme grans meravilhas co vol Dieus so enans. »
Primeiramen dels autres li respondet n’Alans :
« Senher coms, lo tieus ditz e l’orgolhs el bobans
« Nos fara sai remandre de totz bes desirans,
« Car enans seretz velhs e canutz e ferrans
« Que mais aiatz la vila, la tor ni los ambans.
« Et a mi ez als autres es vejaire e semblans
« Que Jhesu Cristz no volha que mais cregua l’engans.
« Pero, sil coms es joves ni tozetz ni efans,
« E es de bona natura e bos e bels e grans,
« E a poder e forsa e de bos amparans,
« Quens destruiens abaicha ens amermals balans.
« E es ben de lhinatge ques milhor e s’enans,
« Qu’en Richartz fo sos oncles e sos parens R.
« Qui quel fassa pecaire eu dic qu’el es enfans,
« Que senas a gitadas a tot lo primer lans.
« E pos cosselh demandas, non es dreit quel soans :
— 4170. de, ms. do. — 4174. Réd. en pr. car senhor, tu sabes ben que nebot es del rey de Fransa, d’aquel d’Anglaterra, et aussi es cosin de Ricard de Normandia, de Rolland et autres que no lo laisseran pas deseretar (p. 70).
