Page:La Chanson de la croisade contre les Albigeois, 1875, tome 1.djvu/185

Le texte de cette page a été corrigé et est conforme au fac-similé.
[1216]
173
croisade contre les albigeois.

Per mieg la vila cridan : « Nostre senhor coraus
3925« Intra per mieg la vila el gautz esperitaus,
(p. 100)« C’oimais no i remandra ni Frances ni Barraus. »
E abtant repaireron e prezon los ostaus,
E escridan la joia el sojorn el repaus.
Mas en breu de termini creis la guerra mortaus,
3930Qu’en Lambert de Limos, us adreitz senescaus,
Guilhelmes de la Mota, Bernartz Azalbertz faus,
Garniren lor companhas els cors e los chivaus,
E eisson per la porta del castel e dels vaus.
Intran per las carreiras e intran de grans saus :
3935Montfort ! Montfort ! escridan ; oimais parlarem d’als,
Car aissi recomensa lo dampnatges el maus.
Per meg la vila leva lo critz el batistaus,
E coro a las armas lo pobles cominaus,
E es mot grans la preissa dels baros Proensaus,
3940E soneron las trompas e mostran lors senhaus ;
E van cridar Tholoza ! e vai levar l’encaus,
E gietan dartz e lansas e las peiras punhaus,
E cairels e sagetas e apchas e destraus,
E lansas e espazas e bastos e tinaus.
3945Tant durament los coitan de sobrels fenestraus,
De trastotas maneiras ab cairos reversaus
Que las boclas pecian [d]els escutz els peitrals,
Que firent les ne menan e lor dan colps mortaus,
Que senes grat per forsalz an el castel enclaus.
3950Mas els se defendero a lei de bos vassaus,
E garniron las tors els murs els cadafaus.
E lo coms fai barreiras de lhissas e de paus,

    — 3928. Ms. lo j. — 3934. Mettre venon, à la place du second intran ? — 3935. Ms. parlarom.