« E jutja e governa e no sias temens,
« Ni not fassa desperdre temensa ni argens.
— Baro, » ditz l’apostolis, « faitz es lo jutjamens :
« Que lo comte es catolix es capte leialmens,
« Mas en Simos tenga la terra.
« Simos tenga la terra, si Dieus l’o a promes,
« E nos jutgem lo dreit aisi com es empres. »
Ez el dicta e jutja si que tug l’an entes :
« Baro, ieu dic del comte que vers catolix es ;
« E sil cors es pecaire ni de re sobrepres,
« Que l’esperit s’en dolha ni s’en clame nilh pes,
« Sil cors dampna la colpa be lhi deu esser pres.
« E fas me meravilhas per que m’avetz comes
« C’al comte de Montfort assignes lo paes,
« Que no vei la dreitura per que far o degues. »
Ditz maestre Tezis : « Senher, la bona fes
« Del comte de Montfort, a cui tant be es pres
« Can cassec la eretgia e la Glieiza defes,
« Li devria valer que la terra tengues.
— Maestre, » ditz lo papa, « el fa ben contrapes,
« Que destrui los catolics engal dels eretges.
« Grans clams e grans rancuras m’en veno cada mes,
« Tant que lo bes abaicha e lo mals es eces. »
- ↑ — 3487. paes, ms. pays. — 3490. pres, ms. ppres, les deux p barrés. — 3495. veno, ms. vene.
— 3475. Corr. Deu perdre ? desperdre ne peut guère s’employer sans régime. Raynouard (IV, 518) n’en cite pas d’autre ex. que celui-ci. Perdre Dieu est employé comme locut. proverb. dans Flamenca v. 1040, et p.-ê. v. 527 (cf. Mussafia, Jahrb. f. rom. lit., VIII, 113).
