« No fo per me destruitz ni raubatz ni fenitz,
« Ni per ma companhia lor camis envazitz.
« Mas d’aquels raubadors, fais trachors, fe-mentitz,
« Que portavan las crotz per qu’ieu fos destrusitz,
« Per me ni per los meus non fo nulhs cosseguitz
« Que no perdes los olhs els pes els punhs els ditz ;
« E sab me bo de lor que ai mortz e delitz,
« E mal d’aquels que son escapatz e fugitz.
« E dic vos de l’avesque que tant n’es afortitz
« Qu’en la sua semblansa es Dieus e nos trazitz ;
« Que ab cansos messongeiras e ab motz coladitz,
« Dont totz hom es perdutz quils canta ni los ditz,
« Ez ab sos reproverbis afilatz e forbitz,
« Ez ab los nostres dos don fo enjotglaritz,
« Ez ab mala doctrina es tant fort enriquitz
« C’om non auza ren diire a so qu’el contraditz.
« Pero cant el fo abas ni monges revestitz
« En la sua abadia fo sil lums escurzitz,
« Qu’anc no i ac be ni pauza tro qu’el ne fo ichitz.
« E cant fo de Tholosa avesques elegitz,
« Per trastota la terra es tals focs espanditz
« Que jamais per nulha aiga no sira escantitz ;
« Que plus de .D. M., que de grans que petitz,
« I fe perdre las vidas els cors els esperitz.
« Per la fe qu’ieu vos deg, al[s] seus faitz e als ditz
« Ez a la captenensa, sembla mielhs Antecritz
« Que messatges de Roma !
— 3323. Réd. en pr. plus de dex mila personas a faictas morir de mala mort (p. 59). Cf. la note sur 3453.
