| 88 | L’ALCORAN. |
Religion ? ils ont reſpondu, nous eſtions foibles & impuiſſans dans la ville de la Meque, ils ont dit. La terre n’eſtoit-elle pas aſſez large pour vous éloigner des meſchans ? l’Enfer ſera leur habitation, excepté aux hommes, femmes & enfans qui eſtoient foibles & impuiſſans, peut-eſtre que Dieu leur pardonnera, il eſt clement & miſericordieux, celuy qui s’éloignera des meſchans pour ſuivre ſa loy, trouvera pluſieurs lieux qui luy ſeront favorables, aſſeurément il recompenſera celuy qui ſortira de ſa maiſon, qui ſera tué pour ſa gloire, & pour ſuivre ſon Prophete, il eſt clement & miſericordieux. Lors que vous ſerez en voyage, vous n’offenſerez pas Dieu d’accourcir vos oraiſons, afin que les infidelles ne vous ſurprennent, ils ſont vos ennemis declarez, lors que tu ſera proche d’eux, & que tu ordonnera aux vray-croyans de faire leurs oraiſons, arreſte auprés de toy une partie d’entr’eux avec leurs armes pour faire garde cependant que les autres feront leurs prieres, après qu’ils auront finy leurs prieres, ils feront comme les premiers, ils prendront les armes, & feront garde pendant le temps que leurs compagnons feront leurs oraiſons, les infidelles deſirent que vous delaiſſiez vos armes pour vous ſurprendre, vous ne ferez point de mal de les laiſſer ſi la pluye vous importune, ou ſi vous eſte malades, mais ſoyez touſjours ſur vos gardes, Dieu a preparé aux infidelles des tourmens ignominieux : Après avoir finy voſtre oraiſon, ſouvenez-vous de Dieu
