| 332 | L’ALCORAN. |
meſpriſez ; Ils diront, Seigneur,. noſtre malheur a prevalu ſur nous, nous avons eſté devoyez, Seigneur delivre nous de ce cette miſere, on nous avoit promis le contraire, veritablement nous avons tres-grand tort. On leur dira, eſloignez vous dans le feu, & ne parlez jamais d’en ſortir ; Pluſieurs de ceux qui m’adorent, diſent, Seigneur nous croyons en toy, pardonne-nous nos pechez, tu es tres-miſericordieux : Vous vous eſtes mocqué d’eux, ô impies, & avez meſpriſé mes commandemens, mais je les recompenſeray de leur perſeverance, &ſeront bien-heureux. On dira aux reſſuſcitez, combien d’années aurez vous demeuré dans la terre ? ils reſpondront, nous y avons demeuré un jour, ou quelques jours ; demandez le aux Anges commis pour en tenir le compte, vous y avez demeuré fort peu de temps ſi vous le ſçavez cognoiſtre, croyez-vous que je vous ay creé & aſſemblé devant moy inutilement, Loüe & exalte Dieu Roy de verité, il n’y a point de Dieu que luy, il eſt le Roy du Ciel, celuy eſt ſans raiſon qui invoque un autre Dieu avec luy, il luy rendra compte de ſes actions, & les infidelles ſeront tres-malheureux ; Dis, Seigneur pardonne les pechez aux gens de bien, tu es le grand miſericordieux.
